2024
Årsrekneskapen for 2024 for Hemsedal kommune er no klar. Resultatet vart betre enn venta, trass i nedgang i skatteinntekter og langt lågare inntekt frå sal av kraft enn året før.
Kommunen leverer eit netto driftsresultat på 19,1 mill. Det er 11,6 mill. betre enn budsjett som følgje av høgare tilskots- og refusjonsinntekter. Kommunen har motteke fleire tilskot enn budsjettert, men det følgjer av tildelinga at desse må avsetjast til bundne fond for bruk til formålet i seinare år. Kommunen har i tillegg motteke høgare refusjon for særleg ressurskrevjande helse- og omsorgstenester, båe som følgje av auka omfang og som følgje av endring i ordninga.
12,1 mill. av årets resultat er nytta som eigenfinansiering av investeringar for å halde låne-opptaket nede etter store investeringar i 2024. Netto lånegjeldsgrad aukar likevel frå 70,6 % til 76,2 %, og ligg dermed høgare en anbefalt gjeldsgrad på 75 %.
Etter årets disponeringar aukar kommunen sitt disposisjonsfond med 8,2 mill. til 65,4 mill.
Årsrekneskapen er no sendt til Viken Kommunerevisjon for revisjon. Tala vil bli presentert meir inngåande på politisk arbeidsdag 26. mars, medan endeleg årsmelding ferdigstillast 31. mars. Vidare skal saken etter planen handsamast i kontrollutvalet 5. mai, formannskapet 13. mai og kommunestyret 28. mai.